Ullarsápa og Ullarnæring

Ístex býður upp á sápu og mýkingarefni sem hentar íslensku ullinni sérlega vel. Sápan er góð fyrir flíkur sem þvegnar eru í höndum en má einnig nota í þvottavél. Sápan inniheldur hvorki bleikiefni né ensím, en þau efni eru ekki æskileg fyrir þvott á viðkvæmum flíkum.

Spurðu um sápuna þar sem Lopinn fæst!

Þvottaleiðbeiningar

Ráðlagður skammtur af bæði sápu og næringu er 25 ml í 5 lítra af vatni fyrir handþvott eða 75 ml fyrir 4-5 kg af taui í þvottavél.

Álafosslopi, Jöklalopi og Léttlopi:

  • Látið flíkina liggja í ylvolgu vatni (30°C) með Lopa ullarsápu í u.þ.b. 10 mínútur. Þvoið síðan varlega í höndunum. Skolið flíkina mjög vel, eða þar til vatnið er alveg tært. Hafið þvotta- og skolvatnið með sama  hitastigi. 
  • Setjið að lokum Lopa ullarnæringu í vatnið og skolið. Nuddið flíkina hvorki né vindið í höndum heldur kreistið úr henni vatnið. 
  • Að endingu má setja flíkina í þvottavél á vindingarkerfi í 1-3 mínútur. Leggið flíkina síðan til þerris á sléttan flöt og í rétt mál.
 

Plötulopi:

  • Flíkur úr Plötulopa eru þvegnar eins og flíkur úr Álafosslopa, Jöklalopa eða Léttlopa að því undanskildu að í fyrsta þvotti má alls ekki láta flík úr Plötulopa liggja í bleyti.  
  • Þvoið flíkina varlega með því að kreista hana í þvottavatninu og skolið flíkina strax að loknum þvotti í ylvolgu vatni. Athugið skolið mjög vel, eða þar til vatnið er alveg tært.
 

Oft er nóg að viðra ullarflík vel í stað þess að þvo hana.